काठमाडौं । टोखा नगरपालिका वडा ८ को आयोजनामा सञ्चालन गरिएको ७ दिने निःशुल्क सेल्फ मेकअप तालिम सफलतापूर्वक सम्पन्न भएको छ। स्थानीय महिलाहरू तथा युवतीहरूलाई सीपमूलक दक्षता अभिवृद्धि गरी आत्मनिर्भर बनाउने उद्देश्यका साथ सञ्चालन गरिएको उक्त तालिम प्रमाण पत्र सहित वितरण गर्दै समापन गरिएको हो।
समापन समारोहमा वडा सदस्य अनुप राई ज्यु प्रमुख अतिथिका रूपमा उपस्थित थिए। साथै वडा सदस्य मिठु नेपाली, वडा सचिव दिनेश सापकोटा, समाजसेवी बिदुर राना मगर लगायतको सहभागिता रहेको थियो। कार्यक्रममा तालिममा सहभागी विभिन्न प्रशिक्षार्थीहरूको उल्लेखनीय उपस्थिति थियो।
तालिम अवधिभर सहभागीहरूलाई आधारभूतदेखि उन्नत स्तरसम्मका सेल्फ मेकअप सीपहरू व्यवहारिक रूपमा सिकाइएको थियो। यसले सहभागीहरूलाई व्यक्तिगत साजसज्जामा दक्ष बनाउनुका साथै भविष्यमा पेशागत रूपमा समेत अघि बढ्न प्रेरणा मिल्ने विश्वास गरिएको छ।
कार्यक्रममा भन्दै वडा सदस्यहरूले यस्तो सीपमूलक तालिमले महिलाको सशक्तीकरण, आत्मविश्वास वृद्धि तथा रोजगारीका अवसर सिर्जनामा महत्वपूर्ण योगदान पुर्याउने बताएका छन्। विशेषगरी, उक्त तालिम सञ्चालनमा सहयोग पुर्याएको न्यु व्यवसायिक परीक्षण केन्द्र प्रति वडा सदस्यहरूले विशेष धन्यवाद व्यक्त गरेका छन्।
समापनका क्रममा सहभागी प्रशिक्षार्थीहरूले पनि तालिम अत्यन्त उपयोगी, व्यवहारिक र प्रभावकारी रहेको प्रतिक्रिया दिएका थिए। साथै, यस्तो अवसर प्रदान गरेकोमा टोखा नगरपालिका तथा वडा कार्यालयप्रति आभार व्यक्त गरिएको छ।
स्थानीय तहबाट यस्ता सीपमूलक तथा निःशुल्क तालिमहरूलाई निरन्तरता दिँदै समुदायको क्षमता अभिवृद्धिमा थप योगदान पुर्याउने अपेक्षा गरिएको छ।
