काठमाडौं । सञ्चार तथा सूचना प्रविधिमन्त्री डा. विक्रम तिमिल्सिना ले सार्वजनिक संस्थानहरूको सुधार र पुनर्संरचना अहिलेको आवश्यकता भएको बताएका छन् । गोरखापत्र प्रकाशनको १२६औँ वर्ष प्रवेशका अवसरमा आयोजित कार्यक्रममा बोल्दै उनले समयअनुकूल ढंगले सार्वजनिक संस्थानलाई अघि बढाउन सरकार आन्तरिक तयारीमा रहेको जानकारी दिए ।
मन्त्री तिमिल्सिनाले संस्थानको हितलाई केन्द्रमा राखेर कर्मचारीहरूले थप जिम्मेवारी, उत्तरदायित्व र उच्च मनोबलका साथ काम गर्नुपर्नेमा जोड दिए । उनले अब समस्या मात्र औँल्याएर नहुने भन्दै समाधानमुखी सोच र व्यवहार आवश्यक रहेको बताए ।
“आजको काम नै भोलिको इतिहास बन्ने भएकाले संस्थालाई गर्व गर्न लायक बनाउने जिम्मेवारी सबैको हो,” मन्त्री तिमिल्सिनाले भने ।
उनले सूचना प्रविधिको तीव्र विकास र डिजिटल मिडियाको प्रभावसँगै सार्वजनिक संस्थानलाई प्रभावकारी, उत्तरदायी र नागरिकमुखी बनाउन सुधार अपरिहार्य रहेको धारणा राखे । बदलिँदो समयअनुसार गोरखापत्रले आफूलाई अन्य सञ्चारमाध्यमभन्दा कसरी फरक, विश्वसनीय र प्रभावकारी बनाउने भन्ने विषयमा गम्भीर समीक्षा गर्नुपर्ने बेला आएको पनि उनले उल्लेख गरे ।
नेपालको भाषिक विविधता देशको महत्वपूर्ण सम्पत्ति भएको उल्लेख गर्दै उनले भाषा संरक्षण, प्रयोग र अपनत्वलाई प्राथमिकतामा राख्नुपर्ने बताए । सञ्चारमाध्यमले नागरिकको अपेक्षा र विश्वासलाई केन्द्रमा राखेर काम गर्नुपर्नेमा पनि उनले जोड दिए ।
नागरिकले तिरेको करबाट सार्वजनिक संस्था सञ्चालन हुने भएकाले जनहितलाई केन्द्रमा राखेर काम गर्नु सबैको दायित्व भएको मन्त्री तिमिल्सिनाको भनाइ थियो ।
यसैबीच, गोरखापत्र संस्थान ले आजदेखि सन्थाल र हायु भाषामा समेत समाचार प्रकाशन सुरु गरेको जनाएको छ । ती भाषासम्बन्धी विशेष पृष्ठको प्रतिकृति मन्त्री तिमिल्सिनाले अनावरण गरेका थिए ।
