काठमाडौं । संघीय संसद् सचिवालयले सांसदहरूको उपस्थितिलाई थप व्यवस्थित र प्रविधिमैत्री बनाउन विद्युतीय हाजिरी प्रणाली लागू गर्ने तयारी गरेको छ । त्यसका लागि सांसदहरूको बायोमेट्रिक विवरण संकलन कार्य सुरु गरिएको सचिवालयले जनाएको छ ।
संघीय संसद्अन्तर्गत हुने बैठक तथा संसदीय समितिका कार्यक्रममा सांसदहरूको उपस्थितिलाई अब विद्युतीय माध्यमबाट अभिलेखन गरिनेछ । यसअघि कागजी रूपमा हाजिरी गर्ने व्यवस्था रहेकामा अब डिजिटल प्रणालीमार्फत हाजिरी व्यवस्थापन गरिने तयारी गरिएको हो ।
सचिवालयका अनुसार बायोमेट्रिक विवरण संकलनसँगै सांसदहरूको औपचारिक तस्वीरसमेत खिचिने भएकाले सांसदहरूलाई संघीय संसद्को लोगो सहित औपचारिक पोशाकमा उपस्थित हुन अनुरोध गरिएको छ ।
सांसदहरूको बायोमेट्रिक विवरण संकलन कार्य वैशाख २८ गतेसम्म सञ्चालन हुने सचिवालयले जानकारी दिएको छ ।
