नतिजा चित्त नबुझे पुनर्योग र उत्तरपुस्तिका हेर्न पाइने

काठमाडौं । सोमबार राति सार्वजनिक गरिएको माध्यमिक शिक्षा परीक्षा (SEE) को नतिजाप्रति चित्त नबुझेका परीक्षार्थीले पुनर्योग तथा उत्तरपुस्तिका हेर्न पाउने भएका छन् ।

राष्ट्रिय परीक्षा बोर्डले नतिजामा असन्तुष्ट विद्यार्थीका लागि पुनर्योग, उत्तरपुस्तिका अवलोकन तथा पुनः परीक्षणको व्यवस्था गरिएको जनाएको छ ।

पुनर्योगका लागि इच्छुक परीक्षार्थीले जेठ १ गतेदेखि जेठ ७ गतेसम्म बोर्डको वेबसाइटमार्फत आवेदन दिनुपर्नेछ । बोर्डका अनुसार विद्यार्थीले आफ्नो उत्तरपुस्तिका हेर्न र पुनः परीक्षण गराउनसमेत सक्नेछन् ।

त्यस्तै, अनुत्तीर्ण विद्यार्थीका लागि आगामी असार १ गतेदेखि ग्रेडवृद्धि परीक्षा सञ्चालन गरिने भएको छ । ननग्रेडेड (NG) प्राप्त सबै विद्यार्थीले मौका परीक्षा दिन पाउने व्यवस्था गरिएको बोर्डले जनाएको छ ।

यस वर्षको SEE परीक्षामा ६५.९८ प्रतिशत विद्यार्थी उत्तीर्ण भएका छन् । परीक्षामा दुई लाख ८४ हजार १६० विद्यार्थी ग्रेडेड भएका छन् भने एक लाख ४६ हजार ५०७ विद्यार्थी ननग्रेडेड भएका छन् ।

यसपटक SEE परीक्षाका लागि दुई लाख ५७ हजार ५२७ छात्रा र दुई लाख ५२ हजार ४३४ छात्रले फाराम भरेकामा चार लाख ३० हजार ६६७ जना परीक्षामा सहभागी भएका थिए ।

नतिजाअनुसार ४८ हजार ३९२ परीक्षार्थीले ३.६० देखि ४.०० GPA ल्याएका छन् भने ८० हजार ३७२ जनाले ३.२० देखि ३.६० GPA प्राप्त गरेका छन् ।

त्यस्तै, ९४ हजार २२२ जनाले २.८० देखि ३.२० GPA, ५५ हजार ९७७ जनाले २.४० देखि २.८० GPA, पाँच हजार १९० जनाले २.०० देखि २.४० GPA तथा ७ जनाले १.६० देखि २.०० GPA प्राप्त गरेका छन् ।

बोर्डका अनुसार दुई विषयसम्म ननग्रेडेड प्राप्त गर्ने विद्यार्थीका लागि तत्काल ग्रेडवृद्धि परीक्षा सञ्चालन गरिनेछ । दुईभन्दा बढी विषयमा ननग्रेडेड आउने विद्यार्थीले भने अर्को वर्ष नियमित परीक्षामा सहभागी हुनुपर्नेछ ।

यस वर्ष शिक्षा मन्त्रालयको निर्देशनअनुसार एक महिनाभित्र नतिजा सार्वजनिक गर्न बोर्डले परीक्षा केन्द्रमै उत्तरपुस्तिका परीक्षण गराएको थियो । वैशाख ५ गतेसम्म देशभरबाट उत्तरपुस्तिका सङ्कलन गरी नतिजा अद्यावधिक तथा कम्प्युटरमा प्रविष्ट गर्ने काम सम्पन्न गरिएको बोर्डले जनाएको छ । गत वर्ष SEE को नतिजा असार १३ गते सार्वजनिक गरिएको थियो ।