बिपी राजमार्ग तथा हिल्सा–सिमकोट सडकखण्ड मा सम्भावित बाढी र सडक निर्माण कार्यका कारण सवारी आवागमन अस्थायी रूपमा बन्द गरिएको छ।
प्रहरी प्रधान कार्यालयले जारी गरेको सूचनाअनुसार काभ्रेपलाञ्चोकको खुर्कोट–नेपालथोक–कटुन्जेबेँसी हुँदै सिन्धुलीसम्म सञ्चालन हुने बिपी राजमार्गमा बाढीको सम्भावित जोखिमलाई ध्यानमा राख्दै यातायात सञ्चालन रोकिएको हो।
प्रहरीका अनुसार २०८३ वैशाख २१ गते साँझ ५ बजेदेखि बिहान ५ बजेसम्म उक्त सडकखण्डमा चल्ने सबै प्रकारका सवारीसाधन अर्को सूचना जारी नभएसम्म बन्द रहनेछन्।
यस्तै, नाम्खा गाउँपालिका–२ च्यादुक क्षेत्रमा सडक विस्तारको काम जारी रहेकाले हिल्सा–सिमकोट सडकखण्डमा पनि यातायात सेवा अवरुद्ध गरिएको छ।
च्यादुक होटलदेखि च्याछरासम्म सडक खन्ने क्रममा माथिबाट ढुङ्गा र माटो खस्ने जोखिम बढेकाले वैशाख २९ गतेदेखि जेठ २ गतेसम्म उक्त सडकखण्डमा सवारी सञ्चालन बन्द गरिएको प्रहरीले जनाएको छ।
