काठमाडौं । प्रतिनिधिसभाको बैठक आज बिहान ११ बजे बस्दैछ, जसमा सरकारको आगामी आर्थिक वर्ष २०८३/०८४ को वार्षिक नीति तथा कार्यक्रममाथि सांसदहरूले उठाएका प्रश्नहरूको जवाफ दिने कार्यसूची रहेको छ ।
प्रधानमन्त्रीको तर्फबाट अर्थमन्त्री डा. स्वर्णिम वाग्लेले राष्ट्रपतिले जेठ २८ गते प्रस्तुत गरेको नीति तथा कार्यक्रममाथि सांसदहरूले उठाएका जिज्ञासा र प्रश्नहरूको जवाफ दिनेछन् ।
यसअघि बुधबारको बैठकमा प्रधानमन्त्री बालेन्द्र शाहले छलफलका लागि प्रस्ताव प्रस्तुत गर्ने कार्यसूची भए पनि सभामुखले अचानक अर्थमन्त्रीलाई बोलाएपछि विपक्षी दलहरूले बैठक अवरुद्ध गर्दै प्रधानमन्त्रीको राजीनामा माग गरेका थिए ।
तर आजको कार्यसूचीअनुसार प्रधानमन्त्रीको सट्टा अर्थमन्त्रीले जवाफ दिने कार्यक्रम तय गरिएको छ ।
जवाफपछि नीति तथा कार्यक्रममा प्राप्त संशोधनहरूलाई निर्णयार्थ प्रस्तुत गरिनेछ । त्यसपछि सभामुखले आर्थिक वर्ष २०८३/०८४ को नीति तथा कार्यक्रम पारित गर्ने कार्यसूची रहेको संसद् सचिवालयले जनाएको छ ।
आजकै बैठकमा अर्थमन्त्रीले आगामी आर्थिक वर्षका लागि ‘विनियोजन विधेयकका सिद्धान्त र प्राथमिकता’ (कर प्रस्ताव बाहेक) माथि छलफलका लागि प्रस्ताव पनि प्रस्तुत गर्नेछन् । यसलाई बजेटपूर्वको महत्वपूर्ण चरणका रूपमा लिइन्छ ।
त्यसैगरी, प्रतिनिधिसभा नियमावली मस्यौदा समितिका सभापति गणेश पराजुलीले ‘प्रतिनिधिसभा नियमावली मस्यौदा समितिको प्रतिवेदन, २०८३’ माथि विचार गरियोस् भन्ने प्रस्ताव पनि प्रस्तुत गर्ने कार्यसूची छ ।
संसद् सचिवालयका महासचिव पद्मप्रसाद पाण्डेका अनुसार आजको बैठकमा नीति तथा कार्यक्रम पारित गर्ने र बजेट निर्माणको प्रारम्भिक छलफल अघि बढाइनेछ ।
