काठमाडौं । काठमाडौंको मच्छेगाउँस्थित प्रसिद्ध मच्छेनारायण मन्दिरमा आजदेखि एकमहिने पुरुषोत्तम मास अर्थात् अधिक मास मेला सुरु भएको छ । ‘मलमास मेला’का रूपमा परिचित यस धार्मिक मेलामा काठमाडौं उपत्यकासहित देशका विभिन्न स्थानबाट हजारौँ भक्तजन सहभागी हुने गरेका छन् ।
धार्मिक विश्वासअनुसार पुरुषोत्तम मासमा भगवान् नारायणको पूजा–आराधना गरे पाप नाश भई पुण्य प्राप्त हुने मान्यता रहिआएको छ । यही आस्थाका कारण भक्तजनहरू मच्छेनारायण मन्दिर पुगेर दर्शन, पूजाआजा तथा विशेष धार्मिक अनुष्ठानमा सहभागी भइरहेका छन् ।
मन्दिर परिसरमा सुनको जलप लगाइएको आकर्षक गरुड प्रवेशद्वारले भक्तजनको ध्यान खिच्ने गरेको छ । साथै, माछाको मुखबाट प्रकट भएको चार हातमा शङ्ख, चक्र, गदा र पद्म धारण गरेका भगवान् मत्स्यनारायणको मूर्ति यहाँको प्रमुख आकर्षणका रूपमा रहेको छ ।
पुराणमा वर्णन भएअनुसार भगवान् विष्णुको दश अवतारमध्ये मत्स्य अवतारलाई पहिलो अवतार मानिन्छ । धार्मिक कथाअनुसार प्रलयकालमा भगवान् विष्णुले मत्स्यरूप धारण गरी समुद्रमा वेदको रक्षा गरेको विश्वास रहिआएको छ ।
