काठमाडौं । विश्व रनिङ समुदायको साझा संस्था एसोसियसन अफ इन्टरनेसनल म्याराथन एण्ड डिस्टेन्स रेस (एम्स) ले नेपालको धारा नेपालगन्ज म्याराथनलाई यस वर्षको प्रतिष्ठित ‘एम्स सोसल अवार्ड’ प्रदान गर्ने घोषणा गरेको छ ।
विश्वभर आयोजना हुने म्याराथन प्रतियोगितामध्ये उत्कृष्ट सामाजिक प्रभाव पार्ने इभेन्टलाई प्रदान गरिने यो अवार्ड निकै सम्मानित मानिन्छ । अवार्ड आगामी जुन १८ देखि २० तारिखसम्म नर्वेको ट्रम्सोमा आयोजना हुने एम्सको २५औँ वर्ल्ड कंग्रेसमा प्रदान गरिने जनाइएको छ ।
नेपालगन्ज म्याराथनका संस्थापक टीएस ठकुरीका अनुसार एम्सकी उपाध्यक्ष तथा छनोट समिति संयोजक मार्था मोरालेसले पत्रमार्फत अवार्डबारे जानकारी दिँदै बधाई व्यक्त गरेकी हुन् । पत्रमा नेपालगन्ज म्याराथनले खेलकुदमार्फत समाजमा सकारात्मक प्रभाव र दिगो विकासका लागि पुर्याएको योगदानको उच्च मूल्यांकन गरिएको उल्लेख छ ।
यसअघि यो अवार्ड इथोपियाको ग्रेट इथोपियन रन, जापानको टोकियो म्याराथन, जर्मनीको म्युनिख म्याराथन, सर्बियाको बेलग्रेड म्याराथनलगायत विश्व चर्चित प्रतियोगिताले प्राप्त गरिसकेका छन् । केही वर्ष रोकिएको उक्त अवार्ड यस वर्षदेखि पुनः निरन्तर प्रदान गर्न थालिएको एम्सले जनाएको छ ।
नेपालगन्ज म्याराथन २०७२ सालदेखि सञ्चालन हुँदै आएको हो । विस्तृत शान्ति सम्झौताको सम्झनामा सुरु गरिएको यो प्रतियोगिता अहिले शान्ति, सद्भाव र एकताको सन्देश फैलाउने अभियानका रूपमा स्थापित भएको छ ।
म्याराथनले खेलकुदसँगै सामाजिक सचेतना अभिवृद्धिमा पनि विभिन्न कार्यक्रम सञ्चालन गर्दै आएको छ । जलवायु परिवर्तनबारे विद्यार्थीलाई सचेत बनाउन ‘गौघाट ग्रीन रन’ र ‘राप्तीसोनारी नेचर रन’ आयोजना हुँदै आएका छन् भने रात्रीकालीन सुरक्षाबारे सन्देश दिन ‘नेपालगन्ज १० के नाइट रन’ सञ्चालन गरिएको छ ।
त्यस्तै, नेपाली सम्पदाको प्रवर्द्धन गर्ने उद्देश्यले ‘काठमाडौं २५ किलोमिटर हेरिटेज रेस’ तथा कर्णाली क्षेत्रमा ‘कर्णाली हाफ म्याराथन’ समेत सुरु गरिएको छ ।
गत वर्ष एम्स बोर्ड बैठकसँगै नेपाल इन्टरनेसनल रनिङ कन्फ्रेन्ससमेत आयोजना गरिएको थियो, जसमा १८ देशका प्रतिनिधिको सहभागिता रहेको थियो । साथै, ‘वन ग्लोबल माइल’ अन्तर्गत कोहलपुर माइल र नेपाल रनिङ म्यागजिनजस्ता कार्यक्रम पनि निरन्तर सञ्चालन भइरहेका छन् ।
संस्थापक टीएस ठकुरीले नेपालगन्ज म्याराथनले विभिन्न सामाजिक अवधारणामा निरन्तर काम गरिरहेकाले अन्तर्राष्ट्रिय स्तरको यो सम्मान प्राप्त भएको बताए ।
