काठमाडौं । परराष्ट्रमन्त्री शिशिर खनालले अब राजनीतिक लाभभन्दा माथि उठेर दीर्घकालीन सोचका साथ काम गर्ने समय आएको बताएका छन् ।
टोखा नगरपालिकाले आर्थिक वर्ष २०८३/८४ को नीति, कार्यक्रम तथा बजेट तर्जुमाका लागि आयोजना गरेको सल्लाह–सुझाव सङ्कलन कार्यक्रममा बोल्दै उनले स्थानीय तहका जनप्रतिनिधिहरूले भविष्यलाई केन्द्रमा राखेर योजना निर्माण गर्नुपर्ने बताए ।
मन्त्री खनालले अल्पकालीन राजनीतिक स्वार्थभन्दा दीर्घकालीन विकास योजनामा ध्यान दिन आग्रह गर्दै आगामी २०–२५ वर्षपछिको पुस्ताले समेत सम्झिने खालका काम गर्ने अवसर अहिलेको स्थानीय नेतृत्वसँग रहेको उल्लेख गरे ।
काठमाडौं क्षेत्र नम्बर ६ का सांसदसमेत रहेका उनले टोखाको दक्षिणी क्षेत्र अत्यधिक बाक्लो बस्तीले भरिएको र उत्तरी क्षेत्रमा अझै खुला जमिन बाँकी रहेकाले व्यवस्थित शहरी विकासमा विशेष ध्यान दिनुपर्ने बताए । उनले टोखाको ऐतिहासिक नेवारी बस्ती तथा शनिबार लाग्ने परम्परागत बजारलाई व्यवस्थित गर्दै पर्यटन प्रवर्द्धन गर्नुपर्ने धारणा राखे । साथै, टोखामा ‘होमस्टे’ विकासको सम्भावना रहेको पनि उनले बताए ।
टोखा–छहरे सुरुङमार्ग विस्तारका क्रममा स्थानीय बस्ती मापदण्डका कारण प्रभावित हुन सक्ने भन्दै मन्त्री खनालले वैकल्पिक उपाय खोज्नुपर्ने आवश्यकता औँल्याए । उनका अनुसार साङ्ला खोला करिडोर र विष्णुमती खोला करिडोरलाई वैकल्पिक मार्गका रूपमा विकास गर्न सके कम लागतमा अन्तर्राष्ट्रियस्तरको सडक निर्माण गर्न सकिनेछ ।
उनले नगरपालिकालाई थप प्रविधिमैत्री बनाउनुपर्नेमा जोड दिँदै कर तिर्नेदेखि सामान्य सिफारिससम्मका सेवा घरबाटै लिन सकिने गरी डिजिटल प्रणाली लागू गर्नुपर्ने बताए ।
कार्यक्रममा बागमती प्रदेशसभा सदस्य तथा पूर्वमन्त्री हरिप्रभा खड्गी श्रेष्ठले जनताले स्थानीय सरकारसँग धेरै अपेक्षा राखेकाले उपलब्ध स्रोत–साधनको अधिकतम उपयोग गर्दै जनमुखी नीति तथा कार्यक्रम ल्याउनुपर्ने बताइन् । उनले विकास निर्माणका काममा राजनीतिक हस्तक्षेप हुन नहुने धारणा पनि व्यक्त गरिन् ।
