बागलुङ । बागलुङको प्रसिद्ध धार्मिकस्थल कालिका भगवती मन्दिरले वैशाख महिनामा ६१ लाख ७८ हजार २१० रुपैयाँ आम्दानी गरेको छ । कालिका भगवती गुठी व्यवस्थापन समितिले आय–व्यय विवरण सार्वजनिक गर्दै उक्त जानकारी दिएको हो ।
समितिका अनुसार वैशाख महिनामा मन्दिर सञ्चालन तथा व्यवस्थापनमा ११ लाख ५८ हजार ५४० रुपैयाँ खर्च भएको छ । खर्च कटाएर मन्दिरले ५० लाख १९ हजार ६७० रुपैयाँ बचत गर्न सफल भएको जनाएको छ ।
सार्वजनिक विवरणअनुसार भेटीबाट मात्रै ३६ लाख ८७ हजार ५४५ रुपैयाँ संकलन भएको छ । त्यसैगरी परेवाबाट १० लाख २९ हजार ५००, भाडाबाट ९ लाख ७१ हजार १४०, आर्थिक सहयोगबाट २ लाख ४ हजार २२० तथा बोकाबाट १ लाख ३६ हजार ३५५ रुपैयाँ आम्दानी भएको उल्लेख गरिएको छ ।
यस्तै, चामलबाट ९३ हजार, पण्डित सेवाबाट २५ हजार ५००, कुखुराबाट ७ हजार ८ सय, विवाहबाट १४ हजार, व्रतबन्धबाट ३ हजार तथा राँगाबाट २ हजार ८ सय रुपैयाँ आम्दानी भएको मन्दिर व्यवस्थापन समितिका अध्यक्ष भुपेन्द्र खड्काले जानकारी दिए ।
खर्चतर्फ कर्मचारी तलबमा ४ लाख ३१ हजार, पूर्वाधार निर्माणमा ६ लाख २ हजार ८००, बिजुलीमा ३९ हजार ४० तथा खाद्यान्न र आवासतर्फ ६० हजार रुपैयाँ खर्च गरिएको समितिले जनाएको छ ।
समितिका अनुसार भेटी तथा सहयोगबाट संकलित रकम मन्दिर व्यवस्थापन, पूर्वाधार विकास तथा धार्मिक गतिविधि सञ्चालनमा प्रयोग हुँदै आएको छ । बागलुङ कालिका भगवती मन्दिर गण्डकी प्रदेशकै प्रमुख शक्तिपीठमध्ये एक मानिन्छ ।
