काठमाडौं । राजधानीमा आगामी जेठ १५ देखि २२ गतेसम्म ‘हिमालयन लिटरेचर फेस्टिभल एन्ड राइटर्स वर्कशप’ आयोजना हुने भएको छ । विश्वका विभिन्न देशका लेखक, कवि, कलाकार तथा साहित्यिक व्यक्तित्वहरूको सहभागितामा महोत्सव सञ्चालन हुन लागेको हो ।
आयोजकका अनुसार महोत्सवमा ७५ भन्दा बढी लेखक, विद्वान्, अनुवादक, सम्पादक, चलचित्रकर्मी तथा कलाकार सहभागी हुनेछन् । महोत्सव नेपाली कथासाहित्यका अग्रणी स्रष्टा गुरूप्रसाद मैनाली प्रति समर्पित रहने निर्देशक सृजना भण्डारी ले जानकारी दिइन् ।
महोत्सवमा नेपालसहित भारत, अमेरिका, बेलायत, क्यानडा, आयरल्याण्ड, अस्ट्रेलिया, अस्ट्रिया, पोर्चुगल, पोल्याण्ड, युक्रेन, फ्रान्स, डेनमार्क, रुस तथा फिलिपिन्सलगायत देशका साहित्यकार तथा कलाकारहरूको सहभागिता रहने अपेक्षा गरिएको छ ।
कार्यक्रमअन्तर्गत कविता वाचन, प्यानल छलफल, साहित्यिक कार्यशाला, मास्टरक्लास, सांस्कृतिक प्रस्तुति, चलचित्र प्रदर्शन तथा अन्तरसंस्कृतिक संवाद आयोजना गरिनेछ । आयोजकले महोत्सवले बदलिँदो विश्व परिवेशमा साहित्यको भूमिका, सिर्जनात्मक सम्भावना तथा साहित्यको उपचारात्मक शक्तिबारे गम्भीर विमर्श गर्ने विश्वास व्यक्त गरेका छन् ।
