केही क्षेत्रमा वर्षाको सम्भावना, लुम्बिनी र सुदूरपश्चिमको तराईमा गर्मी बढ्ने

जल तथा मौसम विज्ञान विभागअन्तर्गत मौसम पूर्वानुमान महाशाखाले हाल देशमा पश्चिमी तथा स्थानीय वायुको प्रभाव रहेको जनाएको छ।

महाशाखाका अनुसार अहिले देशका पहाडी र हिमाली क्षेत्रमा सामान्य बदली रहेको छ भने अधिकांश तराई क्षेत्रमा मौसम मुख्यतः सफा रहेको छ।

आज दिउँसो कोशी, मधेस, बागमती र गण्डकी प्रदेशसहित लुम्बिनी तथा कर्णाली प्रदेशका पहाडी र हिमाली भूभागमा सामान्य बदली रहने अनुमान गरिएको छ। अन्य स्थानमा आंशिक बदलीदेखि मौसम सफा रहनेछ।

कोशी, बागमती र गण्डकी प्रदेशका केही स्थान तथा बाँकी पहाडी र हिमाली भूभागका थोरै स्थानमा मेघगर्जनसहित हल्कादेखि मध्यम वर्षा र उच्च हिमाली क्षेत्रमा हिमपातको सम्भावना रहेको महाशाखाले जनाएको छ।

यता, लुम्बिनी र सुदूरपश्चिम प्रदेशका तराई क्षेत्रमा तापक्रम बढ्ने तथा तातो महसुस हुने सम्भावना रहेको छ।

आज राति पनि कोशी, मधेस, बागमती र गण्डकी प्रदेशमा सामान्य बदली रहनेछ भने अन्य पहाडी तथा हिमाली क्षेत्रमा आंशिक बदली रहने मौसमविद्ले बताएका छन्। केही स्थानमा चट्याङसहित हल्का वर्षाको सम्भावना रहेको छ।