देशका विभिन्न क्षेत्रमा लगातारको वर्षासँगै आएको बाढी र पहिरोका कारण मुख्य राजमार्गहरू प्रभावित भएका छन्। नेपाल प्रहरीले आज बिहान सार्वजनिक गरेको विवरणअनुसार कोशी, बागमती, गण्डकी र कर्णाली प्रदेशका विभिन्न सडक खण्डमा यातायात सेवा अवरुद्ध तथा आंशिक रूपमा सञ्चालन भइरहेको छ।
कोशी प्रदेशअन्तर्गत भोजपुर नगरपालिका–५ बोखिममा बाढीका कारण मध्यपहाडी लोकमार्ग एकतर्फी सञ्चालनमा रहेको छ। उक्त क्षेत्रमा वैकल्पिक मार्गको व्यवस्था गरिएको प्रहरीले जनाएको छ। यस्तै, सङ्खुवासभाको मकालु गाउँपालिका–३ नयाँबस्तीमा पहिरो खस्दा कोशी राजमार्ग पनि एकतर्फी मात्र सञ्चालन भइरहेको छ।
काभ्रेपलाञ्चोकको खुर्कोट–नेपालथोक–कटुञ्जेबेँसी सडक खण्डमा बाढीको जोखिम बढेपछि बीपी राजमार्गमा सवारी सञ्चालन रोकिएको छ।
गण्डकी प्रदेशमा लमजुङ र म्याग्दी बढी प्रभावित भएका छन्। लमजुङको मध्यनेपाल नगरपालिका–१० बिमिरेभञ्ज्याङ क्षेत्रमा पहिरो खस्दा मध्यपहाडी लोकमार्ग पूर्ण रूपमा अवरुद्ध भएको छ। म्याग्दीको अन्नपूर्ण गाउँपालिका–३ जलथलेमा पहिरो गएपछि बेनी–जोमसोम सडक खण्ड एकतर्फी सञ्चालनमा रहेको छ।
यस्तै, कर्णाली प्रदेशको हुम्लास्थित नाम्खा गाउँपालिका–२ मा पहिरोको जोखिम बढेपछि हिल्सा–सिमकोट सडक खण्डमा सवारी आवागमन पूर्ण रूपमा रोकिएको प्रहरीले जनाएको छ।
