काठमाडौं । श्रम संस्कृति पार्टी ले बुधबार पनि प्रतिनिधिसभा बैठकमा विरोध प्रदर्शन जारी राखेको छ।
प्रतिनिधिसभाको बैठक सुरु हुनासाथ पार्टीका सांसदहरू आफ्नो स्थानबाट उठेर विरोधमा उत्रिएका थिए। पार्टीका अध्यक्ष हर्क साम्पाङ सहित सांसदहरूले हातमा पर्चा बोकेर सरकारको ध्यानाकर्षण गराउने प्रयास गरेका हुन्।
सदनको नियमित कार्यसूची अघि बढिरहेका बेला श्रम संस्कृति पार्टीले विभिन्न माग राख्दै लगातार विरोध जनाउँदै आएको छ। बुधबारको बैठकमा पनि सांसदहरूले नाराबाजी नगरी शान्तिपूर्ण रूपमा उभिएर असन्तुष्टि व्यक्त गरेका थिए।
उनीहरूले श्रमिक, युवावर्ग तथा जनजीविकासँग सम्बन्धित विषयमा सरकारले पर्याप्त चासो नदिएको आरोप लगाउँदै संसदमार्फत आफ्ना आवाज उठाइरहेका छन्। विरोधका कारण केही समय सदनको वातावरण प्रभावित बने पनि सभामुखको आग्रहपछि बैठकको कार्यसूची अगाडि बढाइएको थियो।
