काठमाडौं । श्रम संस्कृति पार्टीका अध्यक्ष हर्क साम्पाङले सरकारलाई सदनप्रति जिम्मेवार बनाउन आफूहरूले कोसिस गरिरहेको स्पष्ट पारेका छन् । संसद बैठकमा पर्चा देखाएर गरिएको विरोधलाई निरन्तरता दिने उनले बताएका छन् ।
आज पनि प्रतिनिधिसभा बैठकमा श्रम संस्कृति पार्टीका सांसदहरूले पर्चा देखाएर विरोध जनाएका थिए । सभामुखले उनीहरूलाई आइन्दा यस्तो व्यवहार नगर्न चेतावनी दिएका थिए । तर सदनबाट बाहिरिएपछि सञ्चारकर्मीहरूसँग कुरा गर्दै साम्पाङले विरोध जारी रहने बताएका हुन् ।
उनले भने, ‘जबसम्म सरकार जिम्मेवार हुँदैन, हामी पछि हट्दैनौँ । हाम्रो विरोध पाँच वर्ष नै चल्छ ।’
आफूहरूले सुकुमबासी, लिपुलेक, विदेशी ऋणलगायत विषयमा प्रश्न उठाए पनि मन्त्रीहरूले जवाफ नदिएको उनले बताए ।
‘हामीले उत्तर पाएका छैनौँ । मन्त्रीहरू आउनुहुन्न । दबाबपछि आज २–४ जना मन्त्री आउनुभयो, तर हामीले प्रश्न गर्न पाएनौँ,’ साम्पाङले भने ।
सभामुखले प्रश्न गर्न नपाउने भनेर रुलिङ गरेपछि आफूहरूले विरोध गरेको उनको भनाइ छ ।
यसरी निरन्तर विरोध गर्दा निलम्बन हुन सक्ने प्रश्नमा उनले भने, ‘ठिक छ, हामी तयार छौँ । जनताको लागि, संसदका लागि, व्यवस्थाका लागि निलम्बन भोग्न पनि तयार छौँ ।’
सभामुख सबै दलको साझा अभिभावक हुनुपर्नेमा उनले जोड दिए ।
उनले भने, ‘सभामुख सबैको साझा हुनुपर्छ । उहाँ कुनै दलबाट आए पनि भूमिका साझा हुनुपर्छ । हामीलाई बोल्न नै नदिने अवस्था स्वीकार्य हुँदैन ।’
आफूहरूले संसदमा कुनै अमर्यादित व्यवहार नगरेको पनि उनले दाबी गरे ।
‘हामीले तोडफोड गर्यौँ कि, अपशब्द बोल्यौँ कि ? हामीले केवल पर्चा देखाएर आफ्ना माग राखेका हौँ । पर्चा देखाउन पाइँदैन भनेर कहाँ लेखिएको छ ? नियमावलीमा देखाइदिनुहोस्,’ साम्पाङले प्रश्न गरे ।
