चितवन– यस वर्ष चितवनमा मह उत्पादनमा उल्लेखनीय कमी आएको छ। गत वर्षको तुलनामा यस पटक करिब १६ दशमलव ६६ प्रतिशतले उत्पादन घटेको मौरीपालन विकास केन्द्रले जनाएको छ।
मौरीपालन विकास केन्द्र भण्डाराका प्रमुख सुजन अंगाईका अनुसार गत वर्ष जिल्लामा ५४० मेट्रिक टन मह उत्पादन भएकोमा यस वर्ष घटेर ४५० मेट्रिक टनमा सीमित भएको छ।
जिल्लामा हाल १७ हजार ५०० घार मेलीफेरा मौरी पालन भइरहेको छ। तर बेमौसमी वर्षाका कारण तोरी र चिउरी फूलमा असर पर्दा मह उत्पादन घटेको बताइएको छ। किसानहरूले अघिल्ला वर्षहरूमा तोरीबाट तीन पटकसम्म मह काट्ने गरे पनि यस वर्ष बढीमा दुई पटक मात्रै मह निकाल्न सकेका छन्।
यस्तै चिउरीबाट पाँच पटकसम्म मह संकलन हुने गरेकामा यस पटक तीन पटक मात्र मह काटिएको जनाइएको छ। घारको सङ्ख्या बढ्दै गए पनि उत्पादन भने घट्दै गएको केन्द्रको भनाइ छ।
केन्द्रका अनुसार गत वर्ष ७० प्रतिशत मौरीपालक किसानले वर्षमा छ पटकसम्म मह संकलन गरेका थिए। तर यस वर्ष लगातारको बेमौसमी वर्षाका कारण केवल ३० प्रतिशत किसानले मात्रै छ पटक मह निकाल्न सफल भएका छन्।
चितवनमा हाल करिब ४५० व्यावसायिक मौरीपालक किसान सक्रिय रहेका छन्। जिल्लामा उत्पादन हुने कुल महमध्ये करिब ८० प्रतिशत चिउरी र तोरीबाट उत्पादन हुने गरेको छ भने बाँकी २० प्रतिशत रुदिलो, फापर, पड्के र लिचीजस्ता वनस्पतिबाट उत्पादन हुँदै आएको छ।
