काठमाडौं । सगरमाथाको सफल आरोहण गरेकी नेपालकी ट्रान्स महिला निलम पौडेल काठमाडौं फर्किएकी छिन् । गत शनिबार सगरमाथा सफलतापूर्वक आरोहण गरेसँगै उनी सगरमाथा आरोहण गर्ने पहिलो ट्रान्स महिला बनेकी हुन् ।
मंगलबार त्रिभुवन अन्तर्राष्ट्रिय विमानस्थलमा उनलाई ब्लु डाइमन्ड सोसाइटीकी अध्यक्ष पिंकी गुरुङसहित विभिन्न व्यक्तिहरूले भव्य स्वागत गरेका थिए ।
कार्यक्रममा Laxmi Sunrise Bank, CG Holdings र Shivam Cement लगायतका संस्थाहरूको उपस्थिति रहेको थियो ।
पत्रकारहरूसँग कुराकानी गर्दै पौडेलले सगरमाथा आरोहणलाई आफ्नो जीवनको ऐतिहासिक उपलब्धि भएको बताइन् । उनले सोसाइटीको तर्फबाट सगरमाथा आरोहण गर्ने पहिलो ट्रान्स महिलाको रूपमा पहिचान बनाउन पाउँदा अत्यन्त खुसी लागेको बताइन् ।
“मैले हाम्रो सोसाइटीको तर्फबाट सगरमाथा आरोहण गर्ने पहिलो ट्रान्स महिलाको रूपमा आफ्नो परिचय बनाउन सफल भएकी छु। यसले हाम्रो समुदायका अन्य सदस्यहरूलाई पनि ‘हामीले पनि गर्न सक्छौं’ भन्ने प्रेरणा दिनेछ,” उनले भनिन् ।
पौडेलले यो आरोहणलाई वर्षौँदेखि भोगिएको सामाजिक विभेद, अस्वीकृति र पहिचानको संघर्षमाथिको जितका रूपमा चित्रण गरेकी छिन् ।
