काठमाडौं । प्रधानमन्त्री बालेन्द्र शाह (बालेन)ले नेपालले सन्तुलित, व्यावहारिक र राष्ट्रिय हितअनुकूल विदेश नीतिलाई निरन्तरता दिने बताएका छन् । मंगलबार प्रधानमन्त्री तथा मन्त्रिपरिषद्को कार्यालयमा आयोजित सामूहिक शिष्टाचार भेटवार्ताका क्रममा उनले काठमाडौं तथा नयाँदिल्लीस्थित युरोपेली संघ (ईयू) र सदस्य राष्ट्रका राजदूतहरूसहित ३० देशका कूटनीतिक प्रतिनिधिलाई यस्तो धारणा राखेका हुन् ।
प्रधानमन्त्री शाहले नेपालका छिमेकी मुलुक, विकास साझेदार तथा मित्र राष्ट्रहरूसँगको सम्बन्ध आपसी सम्मान, सार्वभौम समानता र साझा समृद्धिको आधारमा अघि बढिरहेको स्पष्ट पारे । उनले नेपालको विकास, समृद्धि र स्थायित्वका लागि सहयोग पुर्याउँदै आएका सबै मित्र राष्ट्रप्रति आभारसमेत व्यक्त गरे ।
उनले व्यापार, लगानी, हरित ऊर्जा, पर्यटन, जलवायु परिवर्तन तथा पूर्वाधार विकासलगायतका क्षेत्रमा अन्तर्राष्ट्रिय सहकार्यलाई थप विस्तार र सुदृढ बनाउने सरकारको नीति रहेको बताए । नेपाल विदेशी लगानीमैत्री वातावरण निर्माण गर्दै आर्थिक अवसर विस्तार गर्न प्रतिबद्ध रहेको उनको भनाइ थियो ।
भेटका क्रममा प्रधानमन्त्री शाहले विश्वका विभिन्न क्षेत्रमा जारी द्वन्द्वप्रति चिन्ता व्यक्त गर्दै शान्ति स्थापना संवाद, कूटनीति र अन्तर्राष्ट्रिय कानुनमार्फत हुनुपर्नेमा जोड दिए । युद्ध र हिंसाबाट सर्वसाधारण नागरिक सबैभन्दा बढी प्रभावित हुने भएकाले विश्व समुदायले शान्तिपूर्ण समाधानलाई प्राथमिकता दिनुपर्ने उनले बताए ।
प्रधानमन्त्रीका प्रेस तथा अनुसन्धान विज्ञ दिपा दाहालका अनुसार प्रधानमन्त्री शाहले हालै सम्पन्न निर्वाचनले सुशासन, पारदर्शिता र समावेशी आर्थिक समृद्धिका पक्षमा स्पष्ट जनादेश दिएको उल्लेख गरेका थिए । नयाँ सरकार गठन भए पनि नेपालको नीतिगत निरन्तरता, लोकतान्त्रिक मूल्य र राजनीतिक स्थिरताप्रति सरकार पूर्ण रूपमा प्रतिबद्ध रहने उनले स्पष्ट पारे ।
प्रधानमन्त्री शाहले जनताको जीवनस्तर सुधार, रोजगारी सिर्जना, नवप्रवर्तन प्रवर्द्धन तथा दिगो विकास सरकारको मुख्य प्राथमिकता रहेको बताए । प्रक्रियागत सुधारमार्फत लगानी आकर्षित गर्न र नेपाललाई अन्तर्राष्ट्रिय बजारसँग थप जोड्न सरकार सक्रिय रहेको उनको भनाइ थियो ।
भेटमा सहभागी युरोपेली संघ तथा विभिन्न मुलुकका राजदूतहरूले नेपालमा शान्तिपूर्ण रूपमा निर्वाचन सम्पन्न भएकोमा प्रशंसा गरेका थिए । साथै, उनीहरूले सुशासन र आर्थिक समृद्धिको एजेन्डासहित नयाँ सरकारको नेतृत्व सम्हालेकोमा प्रधानमन्त्री शाहलाई बधाई दिँदै नेपालसँग सहकार्य र लगानी विस्तार गर्न इच्छुक रहेको बताएका थिए ।
