काठमाडौँ । भारतको तीनदिने औपचारिक भ्रमण सम्पन्न गरी आइतबार स्वदेश फर्किएका परराष्ट्रमन्त्री शिशिर खनाल आगामी साता उत्तरी छिमेकी मुलुक चीनको भ्रमणमा जाने भएका छन्।
नयाँ सरकार गठनपछि कूटनीतिक सक्रियता बढाइरहेका मन्त्री खनाल जुन १४ (जेठ ३१ गते) मा बेइजिङ प्रस्थान गर्ने कार्यक्रम रहेको परराष्ट्र मन्त्रालय स्रोतले जनाएको छ।
स्रोतका अनुसार जुन १५ र १६ (असार १ र २ गते) मा चीनमा उच्चस्तरीय राजनीतिक भेटवार्ता तय गरिएको छ। भ्रमणका क्रममा मन्त्री खनालले चिनियाँ विदेशमन्त्री वाङ यीसँग द्विपक्षीय वार्ता गर्नेछन्। उक्त भेटमा नेपाल–चीन सम्बन्ध, सीमा व्यवस्थापन, आर्थिक सहकार्य तथा विगतका सम्झौताहरूको कार्यान्वयनबारे छलफल हुने बताइएको छ।
यस्तै, चिनियाँ कम्युनिस्ट पार्टी (सीपीसी) को विदेश विभागका प्रमुखसँग पनि उनको भेटवार्ता तय भएको छ। भ्रमणका क्रममा चीनमा रहेका नेपाली व्यवसायी, विद्यार्थी तथा नेपाली समुदायसँग अन्तरक्रिया गर्ने कार्यक्रम समेत रहेको छ।
परराष्ट्रमन्त्री खनाल जुन १७ (असार ३ गते) मा स्वदेश फर्किने कार्यतालिका छ।
यसअघि काठमाडौँमा सम्पन्न नेपाल–चीन सहजीकरण संयन्त्रको तेस्रो बैठकमा नेपालमा सञ्चालित चिनियाँ लगानीका परियोजनाबारे समीक्षा गरिएको थियो। मन्त्री खनालको चीन भ्रमणका क्रममा बेल्ट एन्ड रोड इनिसिएटिभ (बीआरआई) अन्तर्गतका परियोजना, पूर्वाधार विकास तथा दुई देशबीचको कनेक्टिभिटी विस्तारका विषयमा विशेष छलफल हुने अपेक्षा गरिएको छ।
भारत भ्रमणलगत्तै हुन लागेको यो चीन भ्रमणलाई नेपालको सन्तुलित, सक्रिय र बहुआयामिक परराष्ट्र नीतिको निरन्तरताका रूपमा हेरिएको छ।
