टोखा नगरपालिका वडा नं. ११ स्थित माउन्ट रेडियन्ट हाई स्कुल मा आज दुर्व्यसनमुक्त समाज निर्माण गर्ने उद्देश्यका साथ एक विशेष सचेतनामूलक कार्यक्रम भव्य रूपमा सम्पन्न भएको छ। कार्यक्रममा विद्यालयका कक्षा ७, ८, ९ र १० मा अध्ययनरत विद्यार्थीहरूको उत्साहजनक सहभागिता रहेको थियो।
कार्यक्रममा एक्सप्रेस टिभी न्युज नेपालका प्रबन्ध निर्देशक कुमार भट्टराई मोटिभेसनल प्रशिक्षकका रूपमा सहभागी भई विद्यार्थीहरूलाई दुर्व्यसनका नकारात्मक असरबारे जानकारी गराएका थिए। उनले युवावस्थामा सही निर्णय, सकारात्मक सोच र असल संगतको महत्वबारे प्रेरणादायी प्रस्तुति दिएका थिए।
कार्यक्रममा टोखा नगरपालिका वडा नं. ११ का वडा अध्यक्ष घनश्याम खड्का, विद्यालयका शिक्षकहरू तथा एसपी सरलगायतको विशेष उपस्थिति रहेको थियो। उपस्थित अतिथिहरूले विद्यार्थीहरूलाई अनुशासित, जिम्मेवार र दुर्व्यसनमुक्त जीवनशैली अपनाउन प्रेरित गरेका थिए।
कार्यक्रमका क्रममा दुर्व्यसन भनेको के हो, यसले व्यक्ति, परिवार र समाजमा पार्ने प्रभाव, दुर्व्यसनबाट कसरी टाढा रहने, साथी छनोट गर्दा ध्यान दिनुपर्ने विषयहरू, तथा असल संगत र सकारात्मक वातावरणको महत्व बारे विस्तृत छलफल गरिएको थियो। साथै, चुरोट, मदिरा, लागूऔषध, अनलाइन कुलत तथा अन्य खराब बानीहरूबाट जोगिन अपनाउनुपर्ने उपायबारे पनि विद्यार्थीहरूलाई जानकारी दिइएको थियो।
वक्ताहरूले विद्यार्थीहरूलाई आफ्नो लक्ष्यप्रति केन्द्रित रहन, समयको सदुपयोग गर्न, परिवार र शिक्षकहरूको सुझावलाई सम्मान गर्न तथा असल मित्रताको साथ अघि बढ्न आग्रह गरेका थिए। कार्यक्रममा सहभागी विद्यार्थीहरूले पनि विभिन्न जिज्ञासा राख्दै दुर्व्यसन नियन्त्रण र व्यक्तिगत विकाससम्बन्धी महत्वपूर्ण जानकारी प्राप्त गरेका थिए।
विद्यालय प्रशासनले यस्ता सचेतनामूलक कार्यक्रमले विद्यार्थीहरूमा सकारात्मक सोच, आत्मविश्वास र जिम्मेवारीबोध विकास गर्न महत्वपूर्ण भूमिका खेल्ने विश्वास व्यक्त गरेको छ। कार्यक्रमले विद्यार्थीहरूलाई दुर्व्यसनबाट टाढा रहँदै उज्ज्वल भविष्य निर्माणतर्फ अग्रसर हुन प्रेरित गरेको सहभागीहरूले बताएका छन्।
