नेपाल कम्युनिष्ट पार्टी (एमाले) टोखा नगर कमिटीको आयोजनामा मदन भण्डारीको हिरक जयन्तीको अवसर पारेर आयोजित वृहत् रक्तदान कार्यक्रम टोखा नगरपालिका–७ मा सफलतापूर्वक सम्पन्न भएको छ।
“रक्तदान गरौँ, जीवनदान दिऔँ” भन्ने मानवीय सन्देशलाई आत्मसात् गर्दै आयोजित कार्यक्रममा पार्टीका नेता, कार्यकर्ता, स्थानीय जनप्रतिनिधि, समाजसेवी तथा सर्वसाधारणको उत्साहजनक सहभागिता रहेको थियो।
कार्यक्रममा नेपाल कम्युनिष्ट पार्टी (एमाले) टोखा नगर कमिटीका अध्यक्ष गोपी पाठक, टोखा नगरपालिका–७ का वडा अध्यक्ष, टोखा नगरपालिका–८ का वडा अध्यक्ष रमेश खत्री, वडा ८ सदस्य अनुप राई, विजय बानियाँ लगायत पार्टीका नेता–कार्यकर्ता, जनप्रतिनिधि, सामाजिक व्यक्तित्व तथा स्थानीयवासीहरूको उल्लेखनीय उपस्थिति रहेको थियो।
उपस्थित वक्ताहरूले रक्तदानलाई सबैभन्दा ठूलो मानवीय सेवामध्ये एक भएको उल्लेख गर्दै स्वस्थ व्यक्तिले नियमित रूपमा रक्तदान गर्नुपर्नेमा जोड दिएका थिए। उनीहरूले यस्ता सामाजिक तथा मानवीय कार्यक्रमले समाजमा सकारात्मक सन्देश फैलाउनुका साथै आवश्यक परेको बेला रगत अभावका कारण कसैले पनि ज्यान गुमाउन नपरोस् भन्ने उद्देश्य पूरा गर्न सहयोग पुग्ने विश्वास व्यक्त गरे।
कार्यक्रममा सहभागी रक्तदाताहरूले “रक्तदान गरौँ, जीवनदान दिऔँ” भन्ने भावनाका साथ आफूहरूले रक्तदान गरेको बताउँदै, आफ्नो सानो प्रयासले कसैको अमूल्य जीवन बच्न सक्ने भएकाले सबै सक्षम नागरिकलाई नियमित रूपमा रक्तदान अभियानमा सहभागी हुन आग्रह गरेका थिए।
आयोजक टोखा नगर कमिटीले मदन भण्डारीको सामाजिक रूपान्तरण र जनसेवाको आदर्शलाई आत्मसात् गर्दै आगामी दिनमा पनि यस्ता सामाजिक उत्तरदायित्वका कार्यक्रमलाई निरन्तरता दिने प्रतिबद्धता व्यक्त गरेको छ। रक्तदान कार्यक्रमले मानवीय सेवा, सामाजिक एकता र सहकार्यको भावनालाई थप सुदृढ बनाएको सहभागीहरूको भनाइ रहेको थियो।
