म्याग्दी । चीन र भारत जोड्ने राष्ट्रिय गौरवको कालीगण्डकी करिडोरअन्तर्गत पर्ने बेनी–जोमसोम–कोरला सडक योजनाको कोवाङ–जोमसोम खण्ड निर्माण अलपत्र पारेपछि ठेकेदार कम्पनीसँगको ठेक्का सम्झौता अन्त्य गरिएको छ ।
मुस्ताङको थासाङ गाउँपालिकास्थित कोवाङ खन्तिदेखि टुकुचे, मार्फा हुँदै जिल्ला सदरमुकाम जोमसोम बजारसम्म फैलिएको १७ किलोमिटर सडक नौ वर्षसम्म पनि सम्पन्न नभएपछि बेनी–जोमसोम–कोरला सडक योजना कार्यालयले सार्वजनिक सूचना जारी गर्दै ठेक्का तोडिएको जनाएको हो ।
योजना प्रमुख तेजस्वी शर्माका अनुसार दुई वर्षभित्र सक्नुपर्ने काम सात पटकसम्म म्याद थप्दा पनि पूरा नभएपछि पप्पु–गौरी पार्वती कोशी एन्ड न्यौपाने निर्माण कम्पनीसँगको सम्झौता रद्द गरिएको हो ।
“सातौँ पटक थपिएको म्याद २०८२ असोज २५ गतेसम्म निर्माण सम्पन्न हुनुपर्ने थियो । तर म्याद सकिएको २०० दिन बितिसक्दा पनि कम्पनीले जिम्मेवारी पूरा नगरेकाले सार्वजनिक खरिद ऐन, २०६३ को दफा ५९(७) अनुसार ठेक्का अन्त्य गरिएको हो,” उनले बताए ।
वि.सं. २०७४ जेठ ९ गते रु ७० करोड लागतमा ठेक्का सम्झौता गरिएको उक्त योजनाअन्तर्गत सडक चक्ल्याउने, पर्खाल र नाली निर्माण गर्ने तथा ११ मिटर चौडाइमा कालोपत्र र ढलान गर्ने काम समावेश थियो । पर्वतको मालढुङ्गादेखि म्याग्दी हुँदै मुस्ताङको कोरला नाकासम्म जोड्ने २०२ किलोमिटर सडक स्तरोन्नति योजनामध्ये कोवाङ–जोमसोम खण्ड मात्र अझै अधुरो रहेको छ ।
आयोजनाका अनुसार निर्माण कम्पनीलाई ठेक्का सम्झौता लागतको ०.०५ प्रतिशत जरिवाना समेत तोकिएको छ । हाल टुकुचे क्षेत्रमा ४०० मिटर कालोपत्र र ३०० मिटर आरसिसी ढलान बाँकी रहेको छ । साथै मार्फा राजखोलामाथि करिब एक हजार २०० मिटर कालोपत्र तथा जोमसोमस्थित पुथाङ विमानस्थलमाथिबाट नेपाली सेनाको ब्यारेकसम्म करिब ५०० मिटर क्षेत्रमा संरचना निर्माण र कालोपत्र गर्न बाँकी छ ।
सडक कालोपत्र नहुँदा पर्यटक, स्थानीयवासी, सवारी चालक तथा पैदलयात्रीले वर्षौंदेखि सास्ती भोग्दै आएका छन् ।
