सुधन गुरुङको सम्पत्तिको स्रोत वैध ठहर, दीपक भट्टसँग आर्थिक सम्बन्ध नदेखिएको निष्कर्ष

काठमाडौं । तत्कालीन गृहमन्त्री सुधन गुरुङको सम्पत्ति र सेयर लगानीबारे सार्वजनिक रूपमा उठेका प्रश्नहरूको छानबिन गर्न सरकारले गठन गरेको समितिले उनको सम्पत्तिको स्रोत वैध रहेको निष्कर्ष निकालेको छ। समितिले आफ्नो प्रतिवेदन प्रधानमन्त्री बालेन्द्र शाहसमक्ष बुझाउँदै गुरुङको चल-अचल सम्पत्ति, सेयर लगानी, बैंक मौज्दात, ऋण तथा रेमिट्यान्सलगायतका सबै आर्थिक गतिविधिको स्रोत पुष्टि भएको जनाएको छ।

समितिको प्रतिवेदनअनुसार गुरुङसँग रहेको सम्पत्तिको आर्जन प्रक्रिया अस्वाभाविक नदेखिएको र सार्वजनिक रूपमा आरोप लगाइएझैँ विवादास्पद व्यवसायी दीपक भट्टसँग प्रत्यक्ष आर्थिक कारोबार वा सम्बन्ध पुष्टि हुने कुनै प्रमाण फेला परेको छैन।

छानबिनका क्रममा गुरुङसँग जोडिएका विभिन्न सम्पत्ति, सेयर लगानी, बैंक विवरण तथा ‘हामी नेपाल’ नामक संस्थासँग सम्बन्धित आर्थिक गतिविधिहरू समेत अध्ययन गरिएको थियो। प्रतिवेदनमा गुरुङको नाममा दीपक भट्टको कुनै कम्पनीमा सेयर स्वामित्व रहेको प्रमाण नभेटिएको उल्लेख गरिएको छ।

सरकार निकट स्रोतका अनुसार समितिले सबै आर्थिक विवरण, सेयर लगानी, सम्पत्ति र बैंकिङ कारोबारको विस्तृत अध्ययन गर्दा सार्वजनिक आरोपहरूलाई पुष्टि गर्ने आधार फेला पार्न सकेन। समितिले गुरुङको सम्पूर्ण चल-अचल सम्पत्तिलाई वैध स्रोतबाट आर्जित ठहर गरेको बताइएको छ।

यद्यपि, सुरुदेखि नै गुरुङमाथिको छानबिन संसदीय समितिमार्फत हुनुपर्ने माग उठ्दै आएको थियो। सरकारी तहबाट समिति गठन गरिएकाले यसको निष्पक्षतामाथि राजनीतिक वृत्तमा प्रश्नसमेत उठेको थियो।

छानबिन समितिका अध्यक्ष तथा पूर्वन्यायाधीश अच्युत भण्डारीले प्रतिवेदनमा थप अनुसन्धान आवश्यक पर्ने कुनै विषय नदेखिएको बताए। उनका अनुसार छानबिनका क्रममा मालपोत, भूमिसुधार, यातायात व्यवस्था कार्यालय, बैंक, कम्पनी रजिष्ट्रार कार्यालय, ब्रोकर कम्पनी तथा निर्वाचन आयोगलगायत विभिन्न निकायबाट विवरण संकलन गरी अध्ययन गरिएको थियो।

भण्डारीले प्रतिवेदन तथ्य र प्रमाणमा आधारित रहेको उल्लेख गर्दै समितिले कुनै व्यक्तिगत व्याख्या नगरी प्राप्त प्रमाणका आधारमा निष्कर्ष प्रस्तुत गरेको बताए। उनले सम्पत्ति, सेयर, सुन, पारिवारिक सम्पत्ति, ऋण तथा विदेशबाट प्राप्त रकमसमेतको विस्तृत अध्ययन गरिएको जानकारी दिए।

४३ पृष्ठ लामो प्रतिवेदनमा करिब डेढ सय पृष्ठभन्दा बढी प्रमाण संलग्न गरिएको बताइएको छ। समितिले प्राप्त प्रमाणका आधारमा गुरुङविरुद्ध थप छानबिन आवश्यक नदेखिएको निष्कर्ष निकालेको जनाएको छ।