अभिनेत्री तथा सामाजिक अभियन्ता मायादेवी थामीलाई कला तथा सामाजिक क्षेत्रमा पुर्याएको योगदानको कदर गर्दै ‘International Excellence Award 2026 Nepal & International Summit’ मा ‘Guest of Honour’ का रूपमा सम्मान गरिएको छ।
ABM Presents तथा Samari International Event Pvt. Ltd. को सहयोगमा आयोजित विशेष कार्यक्रममा थामीलाई कला क्षेत्रमा दिएको निरन्तर योगदान तथा सामाजिक सेवामार्फत समाजमा पुर्याएको सकारात्मक प्रभावको सम्मानस्वरूप विशेष अतिथिका रूपमा सहभागी गराइएको हो।
कार्यक्रममा विभिन्न क्षेत्रका व्यक्तित्व, कलाकार, सामाजिक अभियन्ता तथा विशिष्ट अतिथिहरूको सहभागिता रहेको थियो। कला र मनोरञ्जनको क्षेत्रमा आफ्नो पहिचान स्थापित गर्नुका साथै सामाजिक गतिविधिमा समेत सक्रिय रहँदै आएकी थामीको योगदानलाई कार्यक्रममार्फत विशेष रूपमा सम्मान गरिएको आयोजकले जनाएको छ।
थामीले आफूलाई ‘Guest of Honour’ का रूपमा सम्मान गरिएकोमा आयोजकप्रति आभार व्यक्त गर्दै प्राप्त सम्मानले कला तथा सामाजिक क्षेत्रमा अझ जिम्मेवार भएर काम गर्ने प्रेरणा मिलेको बताएकी छन्। उनले समाजमा सकारात्मक परिवर्तनका लागि आफ्नो तर्फबाट निरन्तर योगदान गर्ने प्रतिबद्धतासमेत व्यक्त गरेकी छन्।
कार्यक्रमका प्रमुख अतिथिका रूपमा नेपालका पूर्वउपप्रधानमन्त्री तथा जनता समाजवादी पार्टी (JSP) का अध्यक्ष उपेन्द्र यादवको उपस्थिति रहेको थियो। सोही समारोहमा यादवको हातबाट कुमार भट्टराईले कला तथा सामाजिक क्षेत्रमा पुर्याएको योगदानको कदरस्वरूप प्रतिष्ठित ‘International Excellence Award 2026’ ग्रहण गरेका हुन्।
‘International Excellence Award 2026 Nepal & International Summit’ ले विभिन्न क्षेत्रमा उत्कृष्ट योगदान पुर्याउँदै आएका व्यक्तित्वलाई सम्मान गर्दै उनीहरूको योगदानलाई प्रोत्साहन गर्ने उद्देश्य राखेको आयोजकको भनाइ छ। कार्यक्रममा कला, सामाजिक सेवा, सिर्जनशीलता तथा अन्य क्षेत्रमा उल्लेखनीय भूमिका निर्वाह गर्ने व्यक्तित्वहरूको योगदानको चर्चा गरिएको थियो।
मायादेवी थामीलाई प्रदान गरिएको यो सम्मानले नेपाली कला क्षेत्रसँगै सामाजिक अभियानमा उनको सक्रियता र योगदानलाई थप उजागर गरेको छ। सम्मानपछि थामीलाई विभिन्न क्षेत्रबाट बधाई तथा शुभकामना व्यक्त गरिएको छ।
